Masoang parindikan kawentenan Desa Adat Abianbase, Kasinahane tadah sukil pisan, sekewenten kruna Abianbase punika sampun wenten munggah ring sajeroning lontar Bhuwana Tattwa inggih punika ring Lontar Raja Purana sane wawu kapanggih ring pinanggal 30, sasih Kasa (Juli), warsa 2008, kadruwenang olih Bapak K. Sudarsana saking Br. Basangtamiang, Desa Kapal, Kecamatan Mengwi, Kabupaten Badung.

Ring Lontar Bhuwana Tattwa ngangge aksara bali kuno lan basane punika taler basa bali kuno. Indik daging Lontar inggih punika : mawit saking kawentenan krama Pasek sane kesah saking Gelgel nuju alas Kayu Putih. Mangda nenten kerejek antuk sang sane kuasa ring wewidangan jagate maka miwah para sorohnyane. Makudang-kudang sasih sampun I warga Pasek sampun meneng ring alas Kayu Putih. Pamargine puniki, kariinin antuk Rsi sane maprab Rsi Mpu Bantas, sane mayasa tur ngewangun Pura Dalem Tembau. Sasampun wusan ngewangun parhyangan, Ida mewali mamargi ngantos Ida wauh ring tengahing aas sane mawasta Alas Kayu Putih duk saka 1396 utawi 1474 Masehi.

Ring Lontar Bhuwana Tattwa wenten kesurat kadi ring sor puniki : ngka haneng neritya, genah teku inaran Ceceha mwang Gunung, juga sira ingkana ngawe parhyangan Hyang Bhatara. Ikang Grama Samate kang paisih kidul loring Iwah, mareng kidulnya wana temurose. Mangkana katattwanya. (Ring kelod kauh Desa Semate, wewidangan puniki kawastanin ceceha utawi Cica lan Giri, ring genah punika kramane ngaryaning genah pasucian Hyang Bhatara. Ring wewidangan Kidul Desa Semate kawates olih tukad ring wetan tukad).

Ring Lor desa puniki kawastanin Wana Temurose sangkaning akeh kawentenan temurose (base). Asapunika kawentenannyane. Ring wenten tukad, raris para kramane jumenek drika tur kasuwen-suwen punika kadadosan sane mangkin Desa puniki kawastanin Desa Adat Abianbase.

Desa Adat Abianbase puniki mawiwit sakit 5 (lima) Banjar inggih punika Banjar Gaduh, Banjar Sengguan, Banjar Gede, Banjar Cica lan Banjar Dangin Yeh. Manut pangeling-eling ring Desa Adat Abianbase sane kamanggehang, dados Jro Bendesa Adat inggih punika : Sane kaping pertama puniki sane keuningin I Wayan Simpen, I Wayan Gabrik, I Wayan Mungkleng, Made Beg, I Made Guleng, AA. Gede Kawan, Ketut Sweca, Made Sarga, Made Gunawan, Drs. I Made Sunarta, MM., M.Si.

Rikala panumadengan Jro Bendesa Adat Abianbase Drs. I Made Sunarta, MM., M.Si., raris makarya nyasa symbol Desa Adat sane akeh madruwe kasuksman prasida ngawetuang rasa sagalak sagilik salunglung sabayantaka paras paros sarpanaya ring Krama Desa sami nyujur Jagadhita Santi tur prasida ngelestariang Seni lan Budaya Bali.

Asapunika atur piuning titian kirang langkung ampurayang, dumogi kabenjang pungkuran kategepang malih mangda dados paripurna.